بعد الانتهاكات اللي اتعرضلها أكتر من 200 طفل مصري خلال السنة اللي فاتت على ايدين الأجهزة الأمنية سواء كانت شرطة أحداث، شرطة عسكرية، نيابة عامة أو قضاء عسكري...
وبعد الهجمة الشرسة اللي اتعرضلها الأطفال المقيمين في الشارع والتحريض الإعلامي ضدهم مع تصويرهم على انهم الطرف التالت ولدرجة مخيفة...
بعد كل ده، كان لازم يكون لنا وقفة بقى...
"وقفة بقى" هو اسم حملتنا الشعبية لحماية الطفل المصري من الانتهاكات المنهجية اللي بيتعرضلها على ايد الأجهزة الأمنية واللي هايفضل يتعرضلها بشكل يومي لو محصلش أي تفعيل لقانون الطفل المصري اللي بيكفل ليه كتير من حقوقه الضايعة.
انضموا لينا يوم السبت 21 ابريل الساعة 11 ص. هانعقد مؤتمر صحفي في التحرير لاونج (معهد جوتة، 5 شارع البستان، وسط البلد، القاهرة) ونتكلم فيه عن:
- الانتهاكات اللي اتعرضلها أكتر من 200 طفل من ساعة ما قامت الثورة
- الأطفال اللي خدوا أحكام عسكرية ولحد دلوقتي محبوسين من غير ما حد يعرف عنهم حاجة
- الآثار النفسية والاجتماعية اللي خلفتها الانتهاكات على الأطفال اللي تم الاعتداء عليهم
- تفاصيل حملة "وقفة بقى" وفعالياتها وطرق دعمها أو المشاركة فيها
ليست هناك تعليقات:
إرسال تعليق