حماية الطفل مسئولية مجتمع. حملتنا مش هاتكون فعالة غير لما كل واحد شافها وآمن بيها يبدأ يشاركنا فيها ويدعمها من خلال موقعه. وطرق الدعم أربعة، بتكَوِن مع بعضها كلمة "بسمة" ... بسمة بنحاول نرجعها لأولاد مصر. الأربع طرق هي :
- بــــــــ - بلغ : اتصل بينا (هنا) وبلغنا بأي حالة انتهاك شوفتها أو حتى بتشتبه في وقوعها. هانوصلك بفريق عمل كبير شغله الأساسي نجدة الطفل وحمايته إذا اتعرض للخطر. ولوانتا بتشتغل في مهنة مرتبطة ارتباط مباشر بالأطفال (دكتور أطفال، أخصائي في مدرسة، مدرس، متطوع في أي شغل مع أطفال...) واشتبهت في ان طفل من اللي بتتعامل معاهم اتعرض لاعتداء بس مش متأكد ومش عايز تظلم حد، كلمنا والأخصائيين بتوعنا هايحاولوا يتأكدوا من الواقعة مع الاحتفاظ الكامل بسرية المبلغ.
- ســــــ - سيل مخاطبات: قانون الطفل المصري مليان مواد كفيلة بحمايته من كل أنواع الانتهاكات سواء من الأجهزة الأمنية أو من المحيطين بيه. للأسف كتير من المواد دي محتاج يتفعل وده مش هايحصل غير بضغط شعبي على صانع القرار سواء في البرلمان أو في الأجهزة الحكومية الكبيرة. عشان كده هدفنا اننا كل فترة نقوم بإغراق الأجهزة دي بسيل شعبي من المخطابات (تلغراف، فاكس، إيميل، اتصالات) اللي بتطالب بتفعيل أحد المواد الغير مفعلة في قانون الطفل. دورنا هايكون اعداد نماذج المخاطبات ودورك هايكون انك تبعتها.
- مـــــــ - مولنا: حملتنا مليانة فعاليات كتيرة، منها انتاج فيديوهات عن وضع الأطفال المعرضين للخطر أو اللي بيتعرضوا لانتهاكات. ومنها برضه معارض وورش عمل بنجيب الأطفال فيها يتكلموا ويحكوا بنفسهم عن تجربتهم. لو حابب تساهم معانا بجزء من التكاليف، اتصل بينا (هنا).
- تــــــــ - تطوع في حملتنا: حملتنا بتضم مجموعة حقوقيين، وباحثين، وأخصائيين نفسيين واجتماعيين، وفنانين ومتطوعين مهتمين بملف حماية الطفل. لو حابب تنضملنا وتساعدنا بوقتك املى استمارة التطوع في الحملة (من هنا) واحنا هانكلمك في أقرب وقت. حملتنا هاتنور بيك !
