احنا مجموعة من الحقوقين والنشطاء والأكادميين والفنانين والمواطنين المهتمين بملف حقوق الطفل مع تركيز خاص على طفل الشارع. رصدنا انه من ساعة الثورة لحد دلوقتي، فيه أكتر من 200 طفل احتجزتهم الشرطة العسكرية بعد ماضربتهم وكهربتهم وسجنتهم مع بالغين. فيه كمان أطفال منهم خدوا أحكام عسكرية ولسة محبوسين في طرة حراسة مشدد في أوضاع مزرية. الكلام ده كله بيحصل رغم ان فيه قانون للطفل من المفترض انه يحمي حقوقه ورغم المواثيق الدولية اللي مصر موقعة عليها وملزمة باحترامها. عشان كدة، قررنا نطلق الحملة الشعبية لحماية الطفل "وقفة بقى !" لتسليط الضوء على المخاطر اللي بيتعرضلها الطفل المصري في محاولة للدفاع عن حقوقه وحمايته من الانتهاكات سواء من الأجهزة الأمنية أو في حياته اليومية.
مناديل ورق .. بنستخدمها مرة واحدة ونرميها في أقرب سلة مهملات بعد ماتشيل كل مساوئنا. زي بالظبط طفل الشارع اللي بيبعها في الإشارات، هش وفي نفس الوقت شايل مساوئنا وتقصيرنا كمجتمع.
